“जलशक्ती अभियानांतर्गत ठाणे जिल्ह्यात जलसंवर्धनाची कामे मोठ्या प्रमाणावर हाती घेऊ- जिल्हाधिकारी राजेश नार्वेकर”

ठाणे, दि. २८ (जिमाका): जलशक्ती अभियानांतर्गत ठाणे जिल्ह्यात जलसंवर्धनाची कामे मोठ्या प्रमाणावर हाती घेण्यात येतील, असे जिल्हाधिकारी राजेश नार्वेकर यांनी सांगितले. राज्याचे मुख्य सचिव मनुकुमार श्रीवास्तव यांनी सर्व जिल्हाधिकारी, जिल्हा परिषद यांचे मुख्य कार्यकारी अधिकारी यांच्याशी व्हीडीओ कॉन्फरसन्सिंगद्वारे संवाद साधून या अभियानाबाबत आढावा घेतला. त्यावेळी जिल्हाधिकारी श्री. नार्वेकर यांनी ही माहिती दिली. 
केंद्रीय जलशक्ती मंत्रालयाच्या नॅशनल वॉटर मिशनमार्फत  देशासह राज्यात उद्यापासून दि. २९ मार्च ते ३० सप्टेंबर २०२२ याकालावधीत जल शक्ती अभियान- कॅच द रेन हे अभियान राबविण्यात येणार आहे. त्याचा शुभारंभ उद्या दि. २९ मार्च रोजी देशाचे राष्ट्रपती रामनाथ कोविंद यांच्या हस्ते होणार आहे. यापार्श्वभूमीवर राज्याचे मुख्य सचिवांनी जिल्हा प्रशासनातील अधिकाऱ्यांशी संवाद साधत अभियानाबाबत आढावा घेतला. जलशक्ती अभियानाला जलआंदोलनाचे स्वरुप प्राप्त झाले पाहिजे, असे आवाहन मुख्य सचिवांनी यावेळी केले.
अभियानांतर्गत जिल्ह्यातील प्रत्येक ग्रामपंचायतीत जिल्हा परिषदेच्या माध्यमातून ग्रामसभा आयोजित करून ग्रामस्थांनी पाणी वाचविणे, जलसंवर्धनाबाबत जलशपथ घेण्याचे आवाहन करण्यात आले आहे. या अभियानाच्या माध्यमातून पावसाळापूर्व व पावसाळ्या नंतरचे पाणी साठविण्यासाठी जिल्ह्यात जलसंधारणाची कामे मोठ्या प्रमाणावर हाती घेण्यात येतील, असेही श्री. नार्वेकर यांनी यावेळी सांगितले.