प्रधानमंत्री सूक्ष्म अन्न प्रक्रिया उद्योगासाठी अर्ज करण्याचे आवाहन

ठाणे दि. 06 :- केंद्र शासनाच्या प्रधानमंत्री सूक्ष्म अन्न प्रक्रिया उद्योग योजनेअंतर्गत ‘एक जिल्हा एक उत्पादन’ या आधारावर ठाणे जिल्ह्यात सूक्ष्म प्रक्रिया उद्योग उभारणाऱ्या उद्योजक, संस्थांसाठी कर्ज मंजुरी पंधरवडा साजरा करण्यात येत आहे. या अंतर्गत जिल्ह्यातील शेतकरी, उत्पादक संस्था, सहकारी संस्थांकडून सूक्ष्म उद्योग उभारणीसाठी अर्ज मागविण्यात येत असून इच्छुकांनी ऑनलाईन अर्ज करावे, असे आवाहन जिल्हा कृषी अधिक्षक कृषी अधिकारी मोहन वाघ यांनी केले आहे.
प्रधानमंत्री सूक्ष्म अन्न प्रक्रिया उद्योग योजनेअंतर्गत ठाणे जिल्ह्याला 148 वैयक्तिक उद्योगांना तर, 10 स्वयंसkहाय्यता गट, 3 शेतकरी उत्पादक गट व एका सहकारी संस्थेला अर्थसहाय्य देण्यात येणार आहे. आतापर्यंत एकूण 82 जणांनी नोंदणी केली असून 18 सविस्तर प्रकल्प आराखडे सादर करण्यात आले आहेत. त्यापैकी 12 आराखडे बँकांकडे सादर करण्यात आले आहेत, अशी माहिती कृषी विभागाने दिली आहे.
ठाणे जिल्ह्यात या योजनेला गती देण्यासाठी 18 जानेवारी 2022पर्यंत कर्ज मंजुरी पंधरवडा राबविण्यात येत आहे. या योजनेत सहभागी होऊ इच्छिणाऱ्या इच्छुक व्यक्ती, स्वयंसहाय्यता गट, शेतकरी उत्पादक कंपनी, सहकारी संस्थांनी प्रकल्प उभारणीच्या अर्थसहाय्यासाठी www.pmfme.mofpi.gov.in या संकेतस्थळावर नोंदणी करून अर्ज सादर करावेत. अधिक माहितीसाठी तालुका कृषी अधिकारी/उपविभागीय कृषी अधिकारी अथवा जिल्हा कृषी अधिकारी यांच्या कार्यालयाशी संपर्क साधावा, असे आवाहन श्री. वाघ यांनी केले आहे.